„Við hjá Þekkingu erum gríðarlega stolt af því að styðja við GKG og það íþrótta- og æskulýðsstarf sem klúbburinn sinnir. Samstarf okkar á sér langa sögu og er það okkur sönn ánægja að koma inn sem einn af aðalstyrktaraðilum barna- og unglingastarfs GKG. Með því viljum við leggja okkar á vogarskálarnar til að efla hreyfingu og heilbrigði barna og unglinga og styðja GKG við að gera frábært starf enn öflugra“ segir Stefán Jóhannesson framkvæmdastjóri Þekkingar.

Agnar Már Jónsson, framkvæmdastjóri GKG, segir að allt frá stofnun klúbbsins hafi verið lögð mikil áhersla á barna- og unglingastarf. Slík nálgun er forsenda þess að fjölga iðkendum í íþróttinni og hafi leitt af sér að rúmlega 700 börn og unglingar eru virkir iðkendur í klúbbnum á hverju ári. 

„Þessi fjöldi barna og unglinga vekur verulega eftirtekt í Evrópu en sem dæmi má nefna að um 210 börn og unglingar eru í stærsta golfklúbbi Danmerkur. Það væri óvinnandi vegur að vinna jafn metnaðarfullt starf án aðstoðar frá fyrirtækjum og sveitarfélögum“ segir Agnar Már. „Með þessum samningi er Þekking að styðja þétt við bakið á okkur í þeim málum og kunnum við þeim bestu þakkir fyrir. Nú höfum við tök á að auka um betur þá þjónustu sem við veitum börnum og unglingum í GKG“.